दिलिप महतोको स्मृतिमा माइतीघरमा दीप प्रज्वलन

२५ पुष, काठमाडौं।

अवैध उत्खनन्को विरोेध गर्दा हत्या गरिएका धनुषाका युवा ओमप्रकाश महतो (दिलिप) को सम्झनामा माइतीघरमा दीप प्रज्वलन गरिएको छ । पाँच वर्ष अघि क्रसर व्यवसायीले उनको हत्या गरेका थिए ।

धनुषाको मिथिला नगरपालिका–५ श्रीपुरका दिलिपलाई सम्झिँदै उनका परिवारजन, पर्यावरणका क्षेत्रमा कार्यरत व्यक्ति तथा संस्था र उनको न्यायका लागि कार्यरतहरुले बिहीबार स्मृति दिवसका रुपमा दीप प्रज्वलन गरेका हुन् । उनको हत्याको मुद्दा जिल्ला अदालत धनुषा र उच्च अदालत जनकपुरबाट टुंगिसकेको छ ।

अवैध रुपमा भइरहेको खोला दोहनका विरुद्ध आवाज उठाउँदा क्रसर व्यवसायीले २५ पुस ०७६ मा उनको हत्या गरेका थिए । टिप्परले किचेर उनको हत्या भएको घटना स्मरण गरी माइतीघरमा दीप प्रज्वलन गरिएको हो ।

चुरियामाई बालुवा प्रशोधन उद्योगका सञ्चालक विपिन महतो र कामदार मुनिन्द्र महतोले मिलेर दिलिपको हत्या गरेको अदालतले ठहर गरेको छ । उनीहरु दुवै जनालाई जनही २५ वर्ष कैद सजाय तथा ५–५ लाख क्षतिपूर्ति भराउने फैसला भएको थियो ।

यस घटनामा रंजित भनिने जितेन्द्र कुमार महतोलाई जिल्ला अदालत धनुषाले मतियार ठहर गर्दै सजाय सुनाएको थियो । उच्च अदालत जनकपुरले पनि जिल्लाकै फैसला सदर गरिसकेको छ ।

बिहीबार आयोजित कार्यक्रममा बोल्दै दिलिपकी बहिनी तथा कार्यक्रममा सहभागीहरुले दिलिपलाई प्रथम पर्यावरण सहिद घोषणा गर्नुपर्ने माग गरे । ओमप्रकाश महतो दिलिप पर्यावरण संरक्षण प्रतिष्ठानले उक्त कार्यक्रम आयोजना गरेको थियो ।