पिताबाटै असुरक्षित भएको सूचनापछि तीन बालबालिकाको उद्धार

१९ मंसिर, काठमाडौं ।

आफ्नै पिताबाट असुरक्षित रहेको सूचना पाएपछि काठमाडौं महानगरपालिकाले तीन बालबालिकाको उद्धार गरेको छ । उनीहरुको उद्धारका साथै उनका पितालाई हिरासतमा राखिएको महानगरले जनाएको छ ।

घरमा सौतेनी बाबुबाट असुरक्षित रहेको भन्ने सूचना पाएपछि उनीहरूको उद्धार गरिएको हो । महानगरको बाल उद्धार कार्यदल, बालबालिका खोजतलास सेवा र बाल हेल्पलाइनसहितको संयुक्त टोलीले एक बालिका र दुई बालकसहित तीन जनाको उद्धार गरेको हो ।

११ वर्षिया बालिका कक्षा ६ मा अध्ययनरत छिन् भने उनका ७ र ९ वर्षिय भाइहरु छन् । उद्धार गरिएकी बालिका आफ्नै सौतेनी बुवाबाट जबरजस्ती करणीमा परेको जानकारी महानगरले दिएको छ ।

बालिका अध्ययनरत विद्यालय महानगरकै क्षेत्रभित्र पर्ने भएकाले प्रहरी वृत्त वौद्धको सहयोगमा उनीहरूको उद्धार गरिएको हो । करणीको अभियोग लागेका पितालाई प्रहरी वृत्त, वौद्धले पक्राउ गरी हिरासतमा राखेको छ भने बालबालिकालाई अस्थायी संरक्षणमा राखिएको छ ।