राष्ट्रिय अनुसन्धानका अधिकृतको नक्कली प्रमाणपत्र, पाँच हजार जरिवाना

२६ असार, काठमाडौं

राष्ट्रिय अनुसन्धान विभागमा कार्यरत माधव बस्नेत नक्कली प्रमाणपत्र पेस गरी भ्रष्टाचार गरेको मुद्दामा दोषी पाइएका छन् । बुधबार विशेष अदालतले उनलाई पाँच हजार रुपैयाँ जरिवाना हुने सजाय सुनाएको हो ।

तत्काल प्रचलनमा रहेको भ्रष्टाचार निवारण ऐन, २०१७ अनुसार उनलाई उक्त सजाय सुनाइएको हो । ऐनको दफा १२ अनुसारको कसूर गरेको भन्दै उनलाई विशेषका अध्यक्ष टेकनारायण कुँवर तथा सदस्यहरु तेजनारायण सिंह राई र मुरारीबाबु श्रेष्ठको इजलासले जरिवानाको सजाय तोकेको हो ।

बस्नेतविरुद्ध अख्तियार दुरुपयोग अनुसन्धान आयोगले गत वर्ष २४ मंसिरमा मुद्दा दायर गरेको थियो । उनी ०५४ सालको माघदेखि राष्ट्रिय अनुसन्धानमा कार्यरत थिए ।

सहायक निरीक्षकको पदमा नियुक्ति पाएका उनले बढुवाका लागि नक्कली प्रमाणपत्र पेस गरेको भेटिएको थियो । बस्नेतले माध्यमिक शिक्षा परिषद्बाट हाइस्कुल उत्तीर्ण गरेको भनी झुठो प्रमाणपत्र पेस गरेका थिए ।