पूर्वमन्त्री लामिछानेसँग ६० लाख धरौटी माग

२ माघ, काठमाडौं।

सहरकारीको रकम हिनामिना अभियोग लागेका पूर्व गृहमन्त्री रवि लामिछानेसँग धरौटी मागको आदेश भएको छ । बुधबार जिल्ला अदालत काठमाडौंले उनीसँग ६० लाख रुपैयाँ धरौटी माग गरेको हो ।

राष्ट्रिय स्वतन्त्र पार्टी(रास्वपा)का सभापतिसमेत रहेका लामिछानेको थुनछेक बहस न्यायाधीश माधव प्रसाद अधिकारीको इजलासमा परेकोमा धरौटी माग गर्ने आदेश भएको हो । लामिछानेमाथि कालिमाटीको स्वर्णलक्ष्मी सहकारीको पैसा गैरकानुनी रुपमा गोर्खा मिडियामा लगेको अभियोग छ ।

गोर्खा मिडियाको तत्कालिन सञ्चालकको रुपमा खर्च गर्ने भूमिकामा लामिछाने रहेको दाबीसहित जिल्ला अदालतमा मुद्दा दायर भएको छ । उनीमाथि पाँच करोड रुपैयाँ बिगो कायम गरिएको छ ।

यस अघि सहकारीकै रकम अपचलन अभियोगमा जिल्ला अदालत, कास्कीले लामिछानेसँग ६५ लाख रुपैयाँ धरौटी माग गरेको थियो । लामिछानेमाथि रुपन्देही, चितवन र पर्सामा पनि मुद्दा दायरको तयारी छ । उनले ती जिल्लाका विभिन्न सहकारीबाट ऋण लिइ अपचलन गरेको अभियोग छ ।