प्राधिकरणको सञ्चालक समिति सदस्यमा केसीलाई नियुक्त गर्ने निर्णय कार्यान्वयन नगर्न अन्तरिम आदेश

२६ पुष, काठमाडौं।

नेपाल विद्युत प्राधिरणको सञ्चालक समिति सदस्यमा लक्ष्मण केसीलाई नियुक्त गर्ने निर्णय तत्काल कार्यान्वयन नहुने भएको छ । शुक्रबार उच्च अदालत पाटनले अन्तरिम आदेश जारी गरेपछि नियुक्तिपछिका प्रक्रिया रोकिएका हुन् ।

उच्चको संयुक्त इजलासबाट यस्तो आदेश भएको हो । उच्चका न्यायाधीशद्वय श्यामकुमार भट्टराई र डिल्लीरत्न श्रेष्ठको इजलासले यस रिटमाथि अन्तरिम आदेश जारी गरेको हो । यस अघि १९ पुषमा न्यायाधीश टीकाराम आचार्यले कारण देखाउ आदेश दिँदै अन्तरिम आदेशका लागि दुवै पक्षलाई छलफलमा बोलाएका थिए ।

जनार्दन जोशीले १८ पुसमा उर्जा मन्त्रालय, मन्त्री, विद्युत प्राधिकरण, त्यसको सञ्चालक समिति, तथा सञ्चालक समिति सदस्य लक्ष्मण केसीलाई विपक्षी बनाइ रिट दर्ता गराएका थिए । उर्जामन्त्री खड्काले २ पुषमा केसीलाई सञ्चालक समिति सदस्यमा नियुक्त गर्ने निर्णय गरेकोमा त्यसलाई उत्प्रेषणको आदेशबाट बदर गर्न रिट निवेदकले माग गरेका थिए ।