दैलेखमा भेटियो ग्यास भण्डार

२६ पुष, काठमाडौं।

खानी तथा भूगर्भ विभागले दैलेखमा ग्यास भण्डारण रहेको पत्ता लगाएको छ । दैलेखको जलजलेमा सुरु भएको पेट्रोलियम पदार्थ र प्राकृतिक ग्यास अन्वेषणको कार्य सकिएपछि यस्तो नतिजा आएको हो ।

विभागले २८ वैशाख ०८१ बाट गरिएको ड्रिलिङको कामपछि ग्यास भेटिएको निष्कर्षमा पुगेको जनाइएको छ । चार हजार १३ मिटर गहिराइमा पुग्दा ग्यासको भण्डार भेटिएको हो । नेपालमा अहिलेसम्म गरिएका अन्वेषणहरूमध्ये सबैभन्दा राम्रो नतिजा प्राप्त भएको विभागको भनाइ छ ।

यसै विषयमा थप अध्ययनका लागि ड्रिलिङका वेला संकलन गरिएका नमुनाहरू थप परीक्षणका लागि चीन पठाउने र त्यहाँबाट प्राप्त प्रतिवेदनका आधारमा थप प्रक्रिया अघि बढ्ने खानी तथा भूगर्भ विभागका प्रकाश लुइँटेलले बताए । भण्डारण पत्ता लागेपछि आर्थिक विश्लेषण गरेर उत्पादनका लागि थप काम कसरी अगाडि बढाउन सकिन्छ भनेर विभागले अन्वेषण टोलीलाई पत्र पठाइसकेको बताएको छ ।

करिब तीन महिनासम्म स्पष्ट खाकासहितको प्रतिवेदन चीन सरकारको टोलीले नेपाल सरकारलाई दिएपछि अर्को प्रक्रिया सुरु हुने विभागले जनाएको छ । पेट्रोलियम पदार्थ अन्वेषण तथा उत्खनन् गर्न चीनसँग ०७२ सालमा सहमति भएसँगै चीन सरकारको दुई अर्ब ४० करोडको आर्थिक तथा प्राविधिक सहयोगमा अन्वेषण कार्य सुरु भएको थियो ।

तत्कालीन प्रधानमन्त्री केपी ओलीका पालामा चीनसँग सम्झौता भएको थियो । ग्यास भण्डार भेटिएसँगै दोस्रो चरणको काम सकिएको भए पनि तेस्रो चरणमा लाग्ने खर्च, व्यावसायिक उत्पादन योग्य भए–नभएकोसमेतका कार्य अझै हुन बाँकी छन् । यसबारेमा चीन सरकारले नेपाललाई प्रतिवेदन बुझाएपछि थप प्रक्रिया अगाडि बढ्नेछ ।

यसमा तीनदेखि चार महिना अझै लाग्ने छ । विभागका अधिकारीका अनुसार अब बेल टेस्टिङको काम अगाडि बढाइनेछ । दैलेख सदरमुकामको नारायण नगरपालिका, दुल्लु नगरपालिका र भैरवी गाउँपालिकाको संगमस्थल शिरस्थाननजिकै जलजले क्षेत्रमा पेट्रोलियम पदार्थको अन्वेषणका लागि ४५ रोपनी जग्गा सरकारले अतिक्रमण गरेर अन्वेषणको काम सुरु भएको थियो ।