नेपाल प्रिमियर लिगमा सट्टेबाजी खेलाएको अभियोगमा चार भारतीय प्रहरी नियन्त्रणमा

१८ मंसिर, काठमाडौं ।

नेपाल प्रिमियर लिगको जारी खेलमा सट्टेबाजी खेलाएको भन्दै नेपाल प्रहरीले चार जना भारतीयलाई पक्राउ गरेको छ । १५ गतेबाट त्रिभुवन अन्तरराष्ट्रिय क्रिकेट मैदानमा सञ्चालन भइरहेको खेलमा बेटिङ गरेको भन्दै उनीहरुलाई नियन्त्रणमा लिइएको हो ।

प्रहरीले एक विज्ञप्ती जारी गर्दै केन्द्रीय अनुसन्धान ब्युरोको टोलीले मंगलबार ती व्यक्तिहरुलाई खेल मैदानबाटै पक्राउ गरेको जनाएको छ । भारतको कलकताको २४ वर्षिय सुमन घोष, उत्तर प्रदेश कानपुरका २५ वर्षिय अमित यादव, बिहार सहरसाका २७ वर्षीय सुमन्त कुमार र सोहि स्थानका ३० वर्षीय ब्रजेश कुमार पक्राउ परेका हुन् ।

प्रहरी प्रवक्ता तथा सूचना अधिकारी होविन्द्र बोगटीका अनुसार उनीहरुका साथ विभिन्न कम्पनीका ६ वटा स्मार्ट फोन र भारतीय आधार कार्ड बरामद भएको छ । उनीहरुले स्पोर्टस् बाजी, प्रोबो जस्ता विभिन्न अनलाइन एपबाट पैसाको हारजित हुनेगरी मैदान भित्रैबाट सट्टेबाजी गर्ने गराउने गरेका थिए ।

सट्टाबाजी गर्नु कानूनी अपराध हो । यस्ता कार्यमा सहभागी नहुन र कसूरमा संलग्न कोही भए प्रहरीलाई सूचना दिनसमेत प्रहरी उपरीक्षक बोगटीले आग्रह गरेका छन् ।