पोशाक खरिदमा भ्रष्टाचार अभियोग लागेका चारै जनालाई सफाइ दिने फैसला

१७ मंसिर, काठमाडौं

विशेष अदालतले सोमबार अनियमतिता गरी भ्रष्टाचार गरेको एक मुद्दाका सबै प्रतिवादीलाई सफाइ दिएको छ । न्यायाधीशहरु खुसीप्रसाद थारु, रामबहादुर थापा र मुरारीबाबु श्रेष्ठको इजलासले यस्तो फैसला गरेको हो ।

धनुषाको मिथिलाविहारी नगरपालिकाका प्रमुख प्रशासकीय अधिकृत रामदरश यादवसँगै नगरपालिकाका अन्य दुई कर्मचारी र एक व्यवसायीले भ्रष्टाचार मुद्दामा सफाइ पाएका हुन् । यसै वर्ष २१ असारमा अख्तियार दुरुपयोग अनुसन्धान आयोगले प्रमुख प्रशासकीय अधिकृत यादवका साथै लेखापाल सुभाष कुमार झा र जिन्सी शाखा प्रमुख तथा खरिदार उपेन्द्र यादवलाई प्रतिवादी बनाइ मुद्दा चलाएको थियो ।

नगरपालिकामा आर्थिक वर्ष ०७९÷८० मा सञ्चालित वडा नं. ९ को श्री आधारभूत विद्यालय र श्री रामजानकी प्राथमिक विद्यालयमा विद्यार्थी सिकाइ अविवृद्धि कार्यक्रममा अनियमितता भएको दाबी अख्तियारको थियो । अनुसन्धानका क्रममा उक्त कार्यका लागि सार्वजनिक खरिद ऐन र नियमावली बमोजिम लागत अनुमान गरी दरभाउपत्र आह्वान गरी खरिद मूल्यांकन गर्नुपर्नेमा सो नगरेको भेटिएको थियो ।

प्रमुख प्रशासकीय अधिकृतसमेतको संलग्नतामा नगरपालिकामा सूचीकृत रहेको भनी ३ आपूर्तिकर्ताको झुठो दरभाउपत्र तयार गरी खरिद मूल्यांकन समितिको बैठकमार्फत् मूल्यांकन नगराइ कार्यालयको टिप्पणी आदेशबाट खरिद कार्य गरिएको अभियोगपत्रमा उल्लेख थियो । यस क्रममा झन्डै १० लाख रुपैयाँ अनियमितता भएको भन्दै बिगोसहित मुद्दा चलाइएको थियो ।

विद्यार्थीहरुका लागि ७ प्रकारका २ सय ९५ सेट विद्यालय पोशाक मजदूर होजियरीका प्रोपराइटर रामसुन्दर साहबाट खरिद गरिएकोमा ९ लाख ९६ हजार रुपैयाँ नगरपालिकाबाट भुक्तानी भएको थियो । जबकी त्यसको वास्तविक मूल्य ४ लाख ६१ हजार रुपैयाँ मात्र पर्ने अनुसन्धानले देखाएको थियो । यस मुद्दामा नगरपालिकाका तीन कर्मचारी र व्यवसायी साहसमेत चारैले सफाइ पाएका हुन् ।