बाराका क्याम्पसप्रमुख कुशवाहाको हत्या अभियोगमा सात जना पक्राउ

१२ असार, काठमाडौं

बारास्थित एक क्याम्पसका प्रमुख रहेका हरिभूषण कुशवाहा हत्या प्रकरणमा सात जना पक्राउ परेका छन् । कुशवाहाको गत ३२ जेठमा गोली हानी हत्या गरिएको थियो ।

यस प्रकरणमा सात जनालाई नियन्त्रणमा लिइएको बाराका नायव प्रहरी उपरीक्षक (डिएसपी) दधिराम न्यौपानेले विज्ञप्तीमार्फत् जानकारी दिएका छन् । पक्राउ परेकाहरुमाथि ६ दिनको म्याद थप गरी अनुसन्धान अघि बढाइएको छ ।

डिएसपी न्यौपानेका अनुसार आदर्शकोतवाल गाउँपालिकाका ३२ वर्षिय अवधलाल प्रसाद कुशवाहा, २९ वर्षका चाँदसीप्रसाद कुशवाहा, २७ वर्षिय श्रवण कुमार साह, ५० वर्षिय ब्रह्मदेव राम, ३४ वर्षिय राधेश कुमार पटेल र ५४ वर्षिय विनोद कुर्मीलाई पक्राउ गरिएको हो ।

यसैगरी करैयामाइ वडा नं. ७ का ५० वर्षिय मोतिलाल चौधरीलाई पनि नियन्त्रणमा लिइएको प्रहरीले जनाएको छ । पक्राउ परेकाहरुका साथमा ६ राउन्ड गोली, ३ वटा मोटरसाइकलका साथै नेपाली र भारतीय नम्बरका सिमकार्डसमेत बरामद भएको छ ।

प्रहरी स्रोतका अनुसार उनको हत्यामा जग्ग र घरायसी विवाद जोडिएको प्रारम्भिक अनुसन्धानबाट खुलेको छ । यद्यपि अनुसन्धान टुंगिन बाँकी नै छ ।

यस घटनामा केही फरार अभियुक्तहरु रहेकोमा उनीहरुको खोजी कार्य जारी रहेको प्रहरीले जनाएको छ । मृतक कुशवाहा रामराजा बहुमुखी क्याम्पसका प्रमुख थिए ।

अज्ञात समूहले उनीमाथि आदर्शकोतवाल गाउँपालिकाको बतरा भन्ने स्थानमा गोली प्रहार गरेको थियो । पिठ्यूँमा गोली लागेर घाइते कुशवाहालाई उपचारका लागि वीरगञ्ज लगिएकोमा उपचारका क्रममा मृत्यु भएको थियो ।