कोशी प्रदेश सरकार गठन विवादमा आज फैसला आउँदै

११ असार, काठमाडौं

कोशी प्रदेश सरकार गठन विवादमा सर्वोच्च अदालतले मंगलबार फैसला गर्दैछ । सर्वोच्चले पूर्ण इजलासबाट यो विवाद टुंग्याउन लागेको हो ।

आज अन्तिम बहस सकिएसँगै आजै फैसला आउने सम्भावना छ । यो मुद्दा न्यायाधीशत्रय कुमार रेग्मी, अब्दुल अजिज मुसलमान र नहकुल सुवेदीको इजलासमा छ ।

सर्वोच्च स्रोतका अनुसार सुनुवाइ सकिएपछि अहिले तीनै जना न्यायाधीश फैसला लेखनमा जुटेका छन् । उक्त फैसलाले नै कोशी सरकार कसको नेतृत्वमा जाने सो कुरा तय हुनेछ ।

केदार कार्कीको रिट जारी भएमा मुख्यमन्त्रीको रूपमा केदार कार्की नियुक्त हुनेछन् । अर्कोतिर खारेज गरेमा भने हिक्मत कार्कीकै नेतृत्वमा प्रदेश सरकार रहनेछ ।

कोशी प्रदेशका निवर्तमान मुख्यमन्त्री केदार कार्कीले हालका मुख्यमन्त्री हिक्मत कार्कीलाई समेत विपक्षी बनाउँदै रिट दायर गरेका थिए । जसमाथि जेठ ३१ देखि नै सुनुवाइ हुँदै आएको छ ।

आफूलाई हटाएर प्रदेश प्रमुखले हिक्मत कार्कीलाई मुख्यम्नत्रीमा नियुक्त गरेको भन्दै उक्त निर्णय बदरको मागसहित केदार कार्की सर्वोच्च पुगेका हुन् ।

रिट निवेदक कार्कीले २०८० भदौ २१ मा सर्वोच्चकै पूर्ण इजलासबाट भएको फैसलालाई समेत आधार मानेर आफूमाथि अन्याय भएको निवेदनमा उल्लेख गरेका छन् । उक्त मितिमा न्यायाधीशहरू सपना प्रधान मल्ल, कुमार चुँडाल र नहकुल सुवेदीको इजलासले गरेको फैसलामा सरकार गठनका लागि पटक पटक एउटै धारा प्रयोग गर्न नमिल्ने उल्लेख छ ।